فنان مصري: “أعاني من مشكلة شيرين عبد الوهاب منذ 5 سنوات”
كشف الفنان المصري محمد الشرنوبي أنه يمر بنفس أزمة شيرين عبد الوهاب مع شركة روتانا بخصوص نشر أغانيه، بسبب قضايا ومشاكل مع المنتجة سارة الطباخ.
وقال الشرنوبي في فيديو نشره عبر حسابه على “إنستغرام”: «أنا بقالي 5 سنين في قضايا ومشاكل مع سارة الطباخ أو الشركة اللي كنت ماضي معاها، وفي 24 مايو 2022 طلع حكم بانتهاء عقدي وطلعت الشركة قالت العقد لم ينتهي، وقعدنا شوية لحد ما طلع 3 أحكام تؤكد إن العقد انتهى وإني معنديش أي التزامات بأي شركة إنتاج، وبدأت أشتغل مع واحدة من أهم الشركات في الوطن العربي».
وتابع: «المشكلة اللي بتواجهنا إن الأغاني بتفضل موجودة على كل المنصات لأن موقفنا سليم، لكن في ثغرة في قانون يوتيوب مش عارفين نتعامل معاها، ثغرة معمولة علشان تحمي حقوق الناس، وهي حاجة اسمها سترايك لو حد عملها يوتيوب بيحذف الأغنية، ويدي مهلة 10 أيام لصاحب الـ «سترايك» يرفع قضية، ولو رفعها الأغنية يتم حذفها لحين حل القضية في المحاكم، وده ممكن ياخد من 8 إلى 10 شهور».
واستكمل: «هي استغلت الثغرة دي أول مرة في أغنية “قلبي ارتاح”، وأنا كسبت القضية والأغنية رجعت، وكررت استغلال الثغرة في كذا أغنية وآخرها أغنية استغنيت والقضية مستمرة».
واختتم حديثه بالقول: «مش عارف آخرة اللي بيحصل ده إيه، أنا مكمل وهنزل أغنية يوم الأربعاء، ومش هسكت عن حقي، ومش هسيب حد يتعدى على حقوقي إني أغني وأسمعكم المزيكا اللي بعملها. أنا عامل تقريبا 30 أغنية، وشايل الحاجات الحلوة مش عايز أحرقها».
